Suttra ( সুত্র )
তিরোক্ড্ডু সুত্তং
০১। তিরোকুড্ডেসু তিট্ঠন্তি সন্ধি-সিঙ্ঘাটকেসু চ,
দ্বারবাহাসু তিট্ঠন্তি আগন্ত্বান সকং ঘরং।
০২। পহুতে অন্নপানম্হি খজ্জভোজ্জে উপট্ঠিতো,
ন তেসং কোচি সরতি সত্তানং কম্মপচ্চযা।
০৩। “এবং দদন্তি ঞাতীনং যে হোন্তি অনুকম্পকা,”
সুচিং পণীতং কালেন কপ্পিযং পানভোজনং।
০৪। “ইদং বো ঞাতীনং হোতু সুখিতা হোন্তু ঞাতযো,
তে চ তত্থসমাগন্ত্বা ঞাতীপেতা সমাগতা।
০৫। পহুতে অন্নপানম্হি সক্কচ্চং অনুমোদরে,
“চিরং জীবন্তু নো ঞাতী যেসং হেতু লভামসে।”
০৬। অহ্মাকঞ্চ কতা পূজা দাযকা চ অনিপ্ফলা,
নহি তত্থ কসী অত্থি গোরক্খেত্তঞ্চ ন বিজ্জতি।
০৭। বণিজ্জা তাদিসী নত্থি হিরঞ্ঞেন কযাক্কযং,
ইতো দিন্নেন যাপেন্তি পেতা কালকতা তহিং।
০৮। উন্নমে উদকং বট্টং যথা নিন্নং পবত্ততি,
এবমেব ইতো দিন্নং পেতানং উপকপ্পতি।
০৯। যথা বারিবহা পূরা পরিপূরেন্তি সাগরং,
এবমেব ইতো দিন্নং পেতানং উপকপ্পতি।
১০। অদাসি মে অকাসি মে ঞাতিমিত্তা সখা চ মে,
পেতানং দক্খিণং দজ্জা পুব্বে কতং অনুস্সরং।
১১। নহি রুণ্নং বা সোকো বা যাচঞ্ঞা পরিদেবনা,
ন তং পেতানমত্থায এবং তিট্ঠন্তি ঞাতযো।
১২। অযঞ্চ খো দক্খিণা দিন্না সঙ্ঘম্হি সুপ্পতিট্ঠিতা,
দীঘরত্তং হিতাযস্স ঠানসো উপকপ্পতি।
১৩। সো ঞাতিধম্মো চ অযং নিদস্সিতো,
পেতানং পূজা চ কতা উলারা,
বলঞ্চ ভিক্খূনং অনুপ্পদিন্নং
তুম্হেহি পুঞ্ঞং পসুতং অনপ্পকন্তি।